Mois: août 2013

Òc Tele ! la television en occitan sus internet abans la fin de l’annada

Publié le

La television en occitan per internet que començarà los sons programas abans la fin de l’annada.

Lo projècte qu’ei estat presentat au parat de l’obèrtura de Hestiv’òc, lo hestenau occitan de la vila de Pau.

Lo portaire deu projècte, Lionel Buannic, qu’ei breton e qu’a dejà creat la television per internet en breton.

Dab lo sostien de mantuas collectivitats ( Region Aquitània, Region Miègjorn-Pirenèus, Conselh Generau deus Pirenèus-Atlantics, Conselh Generau de la Dordonha) aquera television que serà a 100% en òc. Virada prumèr cap aus mainatges e aus joens que seràn tanben au servici de tots los qui an enveja de véder enfin programas en occitan ( dessenhs animats, filmes, documentaris, emissions de divertiments, espectacles…).

Desempuish mei de tres ans las duas regions e lo departament deus Pirenèus-Atlantics qu’ajudan au doblatge en occitan de dessenhs animats de filmes e de documentaris en occitan. Aqueths produits que seràn los prumèrs elements de la programacion.
Mes de segur que i aurà mei qu’aquò. Lionel Buannic que vòu perméter a joens realizators de trobar un lòc de difusion. Qu’a prometut tanben que « Òc TELE» serà professionau e que la qualitat deus programas e serà ua preocupacion de las màgers.

Lo president de la Region Aquitània, Alain Rousset, qu’a confirmat devant los centenats d’espectators qui assistivan a l’obèrtura de Hestiv’òc que la Region anava sostiéner aquera television. Qu’ei estat seguit deu president deu CG deus Pirenèus-Atlantics e la Region Miègjorn-Pirenèus qu’a confirmat tanben la soa participacion com ac a hèit lo CG de Dordonha.

Que cau ajustar tanben que lo projècte d’amassar en un lòc unic los professionaus de la comunicacion en occitan qui son installats a l’entorn de Pau ( Ràdio País, Vistedit qui hè La Setmana, Conta’m qui hè doblatge e de segur Òc TELE).

Qu’ei donc un prumèr pas qui serà lo prumèr pas cap a un audiovisuau occitan mei professionau e a la disposicion de tots. Òc TELE que serà gratuita.

Image

Esperem que las autas collectivitats d’Occitania e saberàn viéner ahortir lo projècte. E enfin que cau pensar qu’aqueth projècte que deu estar vist com un mejan de hicar a disposicion d’autas televisions produccions de qualitat. Tanben, que cau contunhar d’exigir deu servici public de har lo son dever de cap a la nosta lenga. N’ac hè pas peu moment. O qu’ac harà o alavetz que calerà exigir de l’Estat ua ajuda entà aqueths qui tribalhan convcretament en favor de la lenga occitanae qui prenen risques pr’amor que creden que i a ua demanda de las hòrtas per ua television en occitan.

David Grosclaude

(fòtos)

Image

La premsa locau qu’a evocat la question de la neishença de la television en occitan per internetImage