L’occitanisme que serà mei present dens la vita publica e qu’aurà un utís de mei entà portar las soas reivindicacions.

Qu’èra l’objectiu : aver elegits occitanistas en comunas entà poder començar de méter en plaça ua associacion d’elegits occitanistas.

Dab 54 elegits municipaus, elegits dab lo labèl BASTIR ! que serà possible. D’autes elegits qui an ua sensibilitat pròcha que poderàn viéner dens l’associacion qui començarà de tribalhar au mes de mai. De segur a la pagèra deu nombre de comunas e autas collectivitats qui existeishen en Occitania n’ei pas enqüèra pro, mes dab aqueras eleccions municipalas qu’ei neishut lo nuclèu qui permeterà de har pravar ua organizacion mei grana, mei hòrta.

A costat, que calerà que contunhe de víver un movement ciutadan. Atau BASTIR ! qu’aurà dus braç : d’un costat un grop d’elegits e de l’aute ua assemblada de ciutadans engatjats qui tribalharàn tanben com un lòc de creacion d’ideas, com un lòc on se poderàn aprestar las eleccions a viéner.

La participacion de BASTIR ! qu’a interrogat l’occitanisme culturau qui’s demandava se non i avèva pas un risc de “comprométer » la reivindicacion linguistica. Adara qu’ei clar. La preséncia de BASTIR ! qu’a permetut de har entrar dens lo debat public la question de la lenga. Pertot on i a avut un candidat BASTIR ! lo debat politic locau qu’a integrat aquera question. Qu’èra l’objectiu.

La preséncia dens la vita publica qu’ei indispensabla entà poder existir. Se non portam pas lo noste projècte com ua question qui a besonh de trobar responsas d’urgéncia n’auram pas de politica publica en favor de l’occitan.

Las candidatas e los candidats de BASTIR ! qu’an hèit aqueth tribalh de portar lo projècte sus la plaça publica. Que contunharàn d’ac har, per delà de las lors diferéncias.

Que pensi qu’ei ua epòca navèra qui’s pòt obrir entà l’occitanisme. Aqueste qu’a besonh de compréner que lo biais d’interviéner dens la societat qu’a cambiat. Que cau segur mantiéner viu un movement associatiu hòrt mes que se’n va temps d’aver dens las institucions interlocutors competents qui saberàn escotar lo monde associatiu e qui saberàn tanben ajudar a cambiar las ideas en projèctes publics.

Los elegits de BASTIR ! que seràn aqueths interlocutors.

Solide, tots los occitanistas n’èran pas en acòrd dab las causidas de tau o tau candidat qui partiva dab tau lista. Mes l’occitanisme qu’ei a l’imatge de la societat, divèrs.

La lenga n’ei pas un enjòc politician, mes qu’ei un enjòc politic deus màgers. Qu’avem besonh de véder las comunas e comunitats de comunas aviar politicas en favor de l’ensenhament de la lenga, de la difusion de la cultura occitana, de la preséncia publica de l’occitan.

Mentre que lo govèrn trantalha a decidir a l’entorn de la refòrma de las collectivitats ( las causas que demoran mei o mensh dens l’estat qui coneishèvam ) qu’ei indispensable d’estar presents a tots los nivèus entà poder coordonar los projèctes e entà dar coeréncia a totas las iniciativas qui son presas per las comunas e comunitats de comunas, sovent shens pro de coordinacion.

Se tot aquò se met en plaça que serà ua ajuda de las granas entau monde associatiu qui a besonh solucions eficaças, bastidas sus exemples d’experiéncias qui hèn hèit la pròva de la lor pertinéncia dens tau o tau parçan d’Occitania.

 

David Grosclaude