Pas de région pour le FN ! Pourtant l’eau continue de monter. La digue que certains se félicitent d’avoir construite est-elle vraiment solide ? N’est-elle pas construite avec de vielles pierres ou peut être même rien que du sable ?

Lo FN n’a pas nada region : tant de bon ! Los partits tradicionaus qu’an hauçat la diga entà empachar l’aigat mes qu’ac an hèit dab pèiras de las vielhas e dilhèu sonque dab sable. L’aiga que contunha de pujar. Lo segond torn qu’a amuishat que l’extrema dreta tanben qu’avèva resèrvas de votz en los abstencionistas. E las paraulas de’us qui disen au ser de las eleccions qu’an comprés la leçon e que non cau pas mei har politica com abans, qu’arriban tard ; que vienen sustot d’aqueths qui non son pas guarits deus maus qui son a l’origina de la crisi politica e qui non pòrtan pas nat projècte.

La refòrma regionau que serà estada ua mauescaduda. N’aurà pas servit a arren. En aqueras eleccions regionaus qu’auram avut mensh de regions segur mes tanben mensh d’atencion a las questions qui pertòcan las regions e los lors poblants, mensh d’interès per çò que pòt portar un poder regionau vertadèr aus problèmas gigants qui son pausats au planeta.

Aquera eleccion que s’ei jogada sus tematicas qui n’avèvan pas arren a véder dab las (magras e praubas) competéncias deus conselhs regionaus.

Un còp de mei la maquina mediatica parisenca qu’a hèit la soa òbra e lo praubèr de la premsa regionau ( e non parli pas de la television regionau qui a ahortit la causa) qu’an escamotat lo debat sus las regions. Los partits que son complicis d’aqueth debat mancat.

Se cau dar un exemple d’aquera catasatròfa mediatica a la francesa qui vivem cada dia, que sufeish per aquò de comptar lo nombre de comentaris qui estón hèits dimenge ser sus lo sol resultat qui èra un pauc diferent, a saber lo de Corsega. N’an pas parlat o quasi deu resultat e sustot n’avem pas podut enténer la reaccion de nat candidat ni lo mendre comentari de quauque politològue sus l’eleccion de la lista deus autonomistas de G.Simeoni a la Collectivitat Territoriau de Corsega.

Incapacitat a analisar la causa ? Malaise devant un resultat atipic ? Volontat de mespresar un resultat qui necessita ua grasilha d’analisi non disponibla ? Tot aquò en medish temps. Solide, Corsega qu’ei ua petita region ( un pauc mei de 300.000 estatjants sia un petit departament) mes totun l’eveniment politic qu’ei important e istoric.

Tota la serada que s’ei passada en admirar la capacitat deus partits dits tradicionaus a empachar l’aiga de pujar e a retardar la catastròfa. Solide lo FN n’a pas nada region. Segur la participacion qu’ei estada mei hòrta que non pas tau prumèr torn. Mes pertot lo FN que tira profieit eth tanben d’ua participacion mei hòrta. Que ganha en votz ; mensh que los autes, mes que ganha tanben.

Que podem díser que dimenge, ta aqueste segond torn de las regionaus, qu’avem decidit d’empachar la pujada de las aigas en hauçar la diga. Mes l’aiga que puja tostemps e quitament s’avem ausit monde de dreta o d’esquèrra a díser « non cau pas mei har politica com abans !» que’s cau interrogar sustot quan vedem lo nombre d’elegits qui cumularàn un pòste de conselhèr regionau dab un de deputat o de conselhèr departamentau o de maire de vila grana o enqüèra dab ua presidéncia d’aglomeracion.

L’esquèrra que s’arregaudeish de pas aver pagat lo prètz qui èra previst. Mes tots que sabem dens quinas condicions se debanèn aqueras eleccions qui n’avèvan pas mei nat enjòc regionau.

Lo nivèu d’informacion deus electors que hasèva paur. Que n’èi encontrat non sabi quantes qui non sabèvan pas çò qu’èra lo perimètre de la lor region ; e per çò qu’ei de las competéncias deu conselh regionau alavetz …

De granas regions, çò disen ! Regions qui n’an pas la mitat de la mitat deu budget d’ua petita region autonòma d’un aute país d’Euròpa. Per exemple la navèra Region Aquitània dab los son 5,8 milions d’estatjants qu’aurà un budget qui serà la mitat de çò qu’a l’Aragon on viven 1,4 milion de personas. L’ua, l’Aquitània navèra, qu’a un budget de 2,8 miliards d’euros e l’auta, l’Aragon, 5,2 miliards.

Non parli pas de las competéncias qui son evidentament plan mendras a noste que non pas en d’autas regions europèas.

Aquesta eleccion regionau que rassegura los qui pensavan de préner ua teca istorica. Lo mòde d’escrutin, las triangularas tanben, qu’an permetut d’amortir la causa e de har lo cohat mensh escosent. Mes que seré suicidari de non pas véder que la miaça de l’extrema dreta ei mei hòrta après aqueth segond torn que non pas abans. Adara qu’avem la pròva que cau aliar los dus partits de la dreta e de l’esquèrra entà arribar a empachar l’eleccion d’un president de region FN ! Aqueste qu’ei lo prumèr partit en votz e que tròba resèrvas au segond torn.

Enfin, totun, que començam d’enténer comentators explicar que non podem pas mei parlar de vòte protestatari mes qu »èm dens l’adesion a ideas. Que se n’anava temps de compréner aquò !

E que non credin pas que l’analisi economicista sia pro entà explicar la causa. Los qui pretenden que lo caumatge e la soa creishença qu’ei la prumèra rason de la creishença deu vòte d’extrema dreta, que s’enganan. Quan disen que lo retorn de la creishença ei LA solucion qu’ei faus. Que’s desbromban que la basa d’aqueth vòte ( espiatz en Provença) qu’èra quauques annadas a, personas qui son en demanda de securitat, de tranquillitat, d’ordi e qui botan en davant l’arrefús de l’estrangèr o de tot çò qui ei vist com tau e qui non son pas dens la misèria.

La question ideologica qu’ei centrau. Los estudis sus çò qui apèran l’insecuritat culturau e tota la literatura qui va a l’entorn que pòrtan elements qui pròvan que la question economica non pòt estar la sola explicacion.

La creishença deu vòte FN per las campanhas que’ns deu interrogar. Lo monde rurau qu’ei tocat e n’ei pas la sola e unica question deu sentiment d’abandon deus territòris qui hè aderir a las tèsis de la familha Le Pen. L’economia qu’explica ua partida deu problèma mes que seré faus de pensar qu’ac pòt explicar tot. Los qui disen açò que vòlen estremar un element qui ei deu maine psicologic, qui a un rapòrt dab lo comportament culturau hargat per imatges simplistas e perilhosas ( França blanca, crestiana, invasion per los musulmans etc…)

L’ambient actuau, la temptacion securitària, l’Estat d’urgéncia e las mesuras qui l’acompanhan n’ajudaràn pas a har baishar lo nivèu de las aigas. E n’ei pas l’ambient nacionalista entertiengut per los qui vòlen concurrenciar lo FN qui serà ua ajuda tanpauc.

En politica qu’ei com tau climat : tot lo monde que disen que cau cambiar quauquarren mes non son pas hòrt nombrós a voler cambiar lo lor anar de pensar e de har a casa, dens lo lor partit, dens la lor familha.

Pr’amor lo resultat — e qu’ei aquò qui compta — qu’ei l’abséncia quasi pertot d’idèas navèras e de personas navas entà las portar.

Se dimenge an hauçat la diga qu’ac an hèit dab pèiras de las vielhas e enqüèra qu’èi paur que sia sonque dab sable !