Los qui son candidats a las eleccions municipaus au nom de BASTIR ! qu’an decidit d’apregondir lo tribalh hèit dinc adara per l’occitanisme devath la soa fòrma associativa mei que mei. BASTIR ! qu’ei neishut entà har entrar l’occitanisme en la vita de cada dia deus occitans.

 

Perqué BASTIR ? Perqué anar a la batalha per aver ua influéncia sus l’anar de las causas e las decisions publicas ?

Que soi estat president de l’IEO e abans aquò que m’avèvan ensenhat que la « la fe shens òbras mòrta es ». E que i credi enqüèra.

Las òbras que pòden estar multifòrmas. L’occitanisme que mia accions de fòrma plan divèrsa mes qu’a tostemps avut reticéncias cap a las accions publicas, cap a l’afirmacion publica. Que m’a sovent arribat d’arregretar aquera timiditat.

Que m’engatgèi en 2004 com president de l’IEO en prepausar d’organizar ua grana manifestacion comuna a totas las associacions e capabla d’amassar tots los qui sentivan la necessitat de díser hòrt e per carrèras las reivindicacions de basa.

Solide qu i avó monde entà aprovar de tira aquera idea ; mes que n’i avó tanben entà’s demandar s’èra plan prudent pr’amor que i avèva un risc d’estar pauc nombrós e finalament de hicar a la lutz un cèrt flaquèr. E òc ! Que i avèva un risc. Mes quin avançar shens préner nat risc ?

Lo resultat que’u vedom en 2005 a Carcassona e que podom constatar que la preséncia qu’anè en créisher dinc a l’an passat a Tolosa on èram pas luenh de 30 000.

 

BASTIR ! qu’ei com investir

 

La volontat de montar un movement capable de presentar candidats a las eleccions municipalas que segueish la medisha logica. Se n’entram pas dens la decision publica, se ne’ns balham pas la capacitat de har espelir en mantuns endrets ua politica lingüistica publica non poderam pas mei avançar. Que seré com ua enterpresa qui deisharé d’investir o d’innovar. Que seré com ua tèrra qui non seré pas entertienguda e qui volerem totun que balhèsse ua recòlta.

BASTIR ! n’ei pas un partit politic mes que va suu terrenh dit politic. La question qu’ei de saber perqué deverem deishar aqueth terrenh a d’autes ? Perqué las decisions de las comunas on demoram los uns e los autes e deverén demorar luenh de çò que demandam e que credem juste.

Que pensam que las nostas ideas son talament justas e bonas que d’autes, en manca d’ideas o esmiraglats per la qualitat de la nosta pensada, e las van méter en aplicacion en plaça nosta ? Aquò n’a pas jamei existit enlòc.

 

L’occitanisme a l’espròva de la vita-vitanta

 

Los candidats de BASTIR ! per las municipalas qui arriban que hèn un tribalh indispensable. Qu’an passat acòrds en mantuas vilas, acòrds escriuts, qui essajaràn de méter en aplicacion. Solide los acòrds non son pas tostemps passats dab caps de listas qui son convençuts de las nostas ideas. Que i acòrds signats dab monde qui n’an pas jamei hèit la mendra accion qui’s poderé qualificar d’occitanista. E alavetz, que volem ? Convéncer los convençuts o ganhar terrenh en aparéisher com un element a préner en compte en la politica publica ?

Qu’avem tot a ganhar a entrar en las municipalitats petitas o granas. Com avèvam a ganhar a entrar en quauques conselhs regionaus. Segur, que cau participar a d’autes debats e méter lo noste occitanisme a l’espròva d’autas tematicas que la tematica culturau e lingüistica. Mes après tot qu’ei aquò la vita, la nosta e la de tots los qui viven en tèrra occitana. Que’s cau encuentar de las questions sociaus, economicas, d’urbanisme, de transpòrts e de tot çò que hè la nosta vita de cada dia.

Acòrds per ua politica publica

 

Qu’èi audit las reticéncias e las criticas de quauques occitanistas per exemple a l’anóncia d’un acòrd per temptar d’aver ua elegida a Tolosa en passar un acòrd dab la lista de Pierre Cohen. Que n’èi entenut d’autes a criticar d’autes acòrds passats en d’autas vilas.

Que calèva har ? Arren, esperar que las municipalas s’acabèssen e qu’arribèssen las decisions shens aver hèita la mendra pression, shens aver provat la nosta capacitat a préner las nostas responsabilitats ?

Qu’èi tanben audit los qui apròvan e qui considèran que cau passar a un nivèu navèth d’intervencion en la vita publica. Que’us encoratgi a viéner a BASTIR ! N’ei pas tròp tard entà integrar ua lista en tau o tau comuna petita o grana. Qu’avem besonh un occitanisme implicat en tèrra occitana, en las causas de cada dia. Que serà lo mei gran sostien entà que’s posca desvolopar lo tribalh hèit peu monde associatiu, peus artistas e creators de tot escantilh.

 

Ua auta pòrta d’entrada

 

A l’òra quan se parla de discutir ( lo 22 de genèr qui arriba) de l’oportunitat de ratificar la Carta europèa qu’ei indispensable d’aver un grop estructurat d’elegits en las diferentas collectivitats.

A l’òra quan se parla de dar a las regions la competéncias en matèria de promocion de las lengas ditas regionaus, qu’avem besonh relais en las autas collectivitats.

Cadun dab las soas conviccions politicas filosoficas o autas que i pòt participar peu biais de BASTIR !

Qu’ei aquò BASTIR ! : la possibilitat de’s hicar a l’òbra. Qu’ei lo parat d’obrir ua pòrta qui cèrcan desempuish annadas los qui’s demandan quin har entà que la question de la lenga entre vertadèrament en las tematicas qui son presas en carga per la societat occitana.

 

David Grosclaude