Per un recampament en favor de la lenga abans las eleccions de 2015

Lo Partit Occitan a sostengut a cada còp las mobilizacions en favor de la lenga occitana que foguèron organizadas pel movement cultural amassat dins lo collectiu « Anem Òc ! ».

De 2005 a 2012 aquelas manifestacions coneguèron un succès important e a cada crida lançada pel collectiu los occitans foguèron mai nombroses a se mobilizar. Saludam lo trabalh dels militants que trabalhèron per organizar aqueles recampaments istorics.

Per delà lo dinamisme qu’aquò donèt al monde associatiu cultural, per delà lo resson mediatic, per delà la reconeissença que i ganhèt l’occitanisme cultural, constatam tanben qu’aquelas manifestacions faguèron bolegar las institucions.

Mostrèron als que ne dobtavan que i a una vertadièra mobilizacion populara en favor de la lenga occitana. Permetèron de legitimar la demanda de la mesa en plaça d’una politica publica en favor de la lenga occitana.

Los elegits del Partit Occitan an participat e participan encara a aquel trabalh dins las collectivitats ont son elegits. D’elegits novèls venon de dintrar dins las comunas ; se son engatjats a trabalhar en favor de la lenga e de sa reconeissença.

Mas, o sabèm totes, la lenga es pas l’afar d’un partit, d’un grop o d’una institucion : es l’afar de totes.

L’expression de la volontat populara sus la question de la lenga dèu èstre permanenta, regularament exprimida per de moments fòrts de mobilizacion e de formulacion de las demandas.

Sabèm tanben que lo periòde de crisi que vivèm pòt èstre un pretèxte per redusir o escafar de politicas que semblan segondàrias a l’un o a l’autre. Far d’estalvis sus la politica en favor de l’occitan, qu’es ja fòrça limitada, es una temptacion que s’ausís regularament.

Per totas aquelas rasons volèm dire al movement associatiu que nos sembla important de tornar mobilizar l’ensemble de l’occitanisme, per delà las divergéncias politicas o autras, per far ausir las demandas en favor de çò qu’es lo ben de totes a saber la lenga occitana.

Segur lo Partit Occitan demanda pas a participar a l’organizacion d’aquela manifestacion dins la mesura que respècta la neutralitat politica dels que fòrman «Anem Òc ! ». Pasmens pensam qu’es necessari de far quicòm abans las eleccions venentas de 2015.

Sens aquò las institucions e los elegits que i son dedins, auràn mai de mal per justificar lors demandas de refortiment d’una politica publica per l’occitan.

Sèm segurs que los milièrs d’occitans que se recampèron en 2005, 2007, 2009 e 2012 espèran quicòmx. Sèm segurs que la sola crida lançada « Anem Òc ! » sufís ja per mobilizar fòrça monde.

Es vertat que cal trobar un lòc, mas aquò se deuriá far aisidament. Sabèm tanben que demanda d’energia militanta per l’organizacion ; mas de pas far res serà encara mai costós del punt de vista de la mobilizacion e de las accions futuras.

Lo Partit Occitan, de la plaça ont se tròba, farà sa part de trabalh per mobilizar mas la responsabilitat de lançar lo movement es del monde associatiu cultural.

 

David Grosclaude

president del Partit Occitan