Résumé

Ce dimanche17 mai à Muret BASTIR ! a décidé de poursuivre son travail. Après les élections municipales qui ont permis de voir l’élection de 55 élus qui se revendiquent de BASTIR ! le mouvement a décidé de rester actif afin de permettre que la question occitane soit toujours plus présente dans la vie publique. BASTIR ! reste un mouvement social dans lequel se retrouvent des personnes de sensibilité politique diverses et qui acceptent comme base le texte du Manifeste Occitaniste.

BASTIR ! se donne pour objectif de travailler à une réflexion sur la future réforme des collectivités et sur les futures élections territoriales de façon à ce que des candidats occitanistes soient présents, comme cel a été fait pour les municipales.

A côté de BASTIR ! et de façon indépendante du mouvement travaillera une association des élus occitans. Créée sur la base de l’ancienne association ACEOC, cette association sera ouverte à tous les élus qui souhaite que soit mise en place une politique publique en faveur de la langue occitane.

l’association des élus sera ouverte aux diverses sensibilités politiques et aux élus des diverses collectivités ainsi qu’aux parlementaires.

En seguida de las eleccions municipaus deu mes de març passat qu’èra organizada aqueste dimenge 17 de mai, a Murèth, ua amassada de BASTIR ! e deus navèths elegits municipaus entà parlar de l’aviéner de Bastir ! e tanben de la futura associacion deus elegits occitanistas.

Un cinquantenat, de personas, au demiei de lasquaus la mitat d’elegits, qu’a tribalhat lo matin entà har lo bilanç de las municipaus e de BASTIR !

Qu’ei l’adjunta au maire de Murèth qui arcuelhó oficiaument l’amassada. Que cau senhalar que ua conselhèra municipau de BASTIR ! qu’ei presenta dens l’equipa municipau de la vila. En tot mei de 120 candidats èran estats labelizats BASTIR ! e 55 son estats elegits.

Desempuish que son estats mantuns elegits municipaus, qui n’avèvan pas lo labèl de BASTIR ! a demandar se podèvan participar au tribalh comun qui’s harà en l’associacion deus elegits occitans. Quauques uns qu’èran d’aulhors presents a Murèth. Un vintenat d’elegits qu’avèvan hèit saber que non podoren estar presents fisicament mes qu’èran part-prenents a la seguida deu tribalh començat abans las eleccions.

 

Dus talhèrs

Lo vrèspe, que son estats mes en plaça dus talhèrs. Lo prumèr qu’èra consacrat a la seguida deu movement BASTIR ! e lo segond a l’estructuracion de l’associacion deus elegits.

Per çò qu’ei de BASTIR ! qu’estó decidit de contunhar lo tribalh entamenat. Que significa que BASTIR ! en tant que movement ciutadan ubèrt, que contunharà d’existir. Qu’ei hèit entà arcuélher tots los qui, en acòrd dab lo tèxte basic deu Manifèste Occitanista, e desiran seguir lo tribalh de reflexion sus la preséncia de l’occitanisme dens lo domeni politic au sens larg deu mot.

BASTIR ! que demora donc un lòc de reflexion e de concertacion ubèrt qui n’ei pas un partit politic mes un movement sociau.

Que tribalharà per l’aviéner sus dus tèmas màgers.

Lo prumèr qu’a per mira de soscar e de har proposicions sus la question de la refòrma territoriau anonciada peu govèrn. BASTIR ! que deu portar ua espiada e ua analisi occitanista d’aqueth projècte. Qu’ac harà pro rapidament gràcias a çò que portaràn tots los qui volhan participar a la reflexion sus aquera question centrau entà l’aviéner de las collectivitats deu territòri occitan.

La segonda question a laquau tribalharà lo movement que serà d’aprestar la preséncia de candidats occitanistas, labelizats BASTIR!, per las eleccions territoriaus a viéner. Segur, vist lo contèxte politic, non sabem pas enqüèra çò que seràn aqueras eleccions ni quan se debanaràn. Totun que cau, en la dralha de çò hèit per las municipaus, pensar a recercar lo biais d’estar presents en aqueths escrutins e perméter l’emergéncia d’un grop d’elegits occitanistas.

BASTIR ! que seguirà de foncionar dab comitats locaus ubèrts (qui son lòcs de discussion tau com foncionèn per la municipaus) e un comitat de pilotatge nacionau compausat de tretze personas qui coordonan las accions e los debats, en tot respectar ua hòrta autonomia deus grops locaus.

Associacion deus elegits

Lo segond talhèr de la vrespada que tribalhè sus la question de l’associacion deus elegits. Que’s tròba que, dempuish 1999, qu’existeish l’ACEOC (Associacion dels conses e elegits occitans). Aquesta associacion n’a pas dempuish quauques annadas de vertadèra activitat mes qu’a tostemps ua existéncia legau e estatuts depausats.

Qu’estó prepausat d’organizar per las setmanas qui arriban (segurament a la fin de l’estiu) ua amassada generau de l’ACEOC entà prepausar de la cambiar en Associacion deus Elegits Occitans a laquau e s’associaràn los navèths elegits gessits de l’escrutin de març

L’associacion que serà ubèrta a tots los elegits occitans, que sian estats labelizats per BASTIR ! o pas. Qu’arcuelherà tots los elegits quau que sia la lor etiqueta, dab resèrvas taus qui non son pas respectuós deus principis republicans e de tolerància en conformitat dab las valors qui pòrta la cultura occitana. Los elegits municipaus que seràn segurament los mei nombrós mes l’associacion que serà ubèrta a tots los elegits que sian conselhèrs generaus, regionaus o parlamentaris.

La volontat qu’ei tanben d’arcuélher los elegits de tot lo territòri occitan, çò que significa que serà ubèrta aus aranés e aus de las valadas italianas.

L’associacion deus elegits occitans que deu estar ua estructura d’escambis enter elegits qui vòlen tribalhar en favor de la lenga e de la cultura occitana. La mesa en plaça d’ua politica publica en favor de la lenga qu’ei l’objectiu marcat dens los estatuts de l’associacion. N’aurà pas a har nada intervencion dens lo domeni electorau o partisan. Que volerà miar accions de sensibilizacion e d’intervencion auprès deus poders publics e tanben prepausar conselhs e ajuda a aqueths qui voleràn méter en plaça en la lor collectivitat ua politica publica en favor de l’occitan.

Dab aquera jornada de Murèth BASTIR ! qu’a provat la soa capacitat a perméter lo dialògue enter personas qui an sensibilitats o apartenéncias politicas divèrsas mes qui son unidas per la volontat de dar a l’occitanisme un lòc de reflexion e de coordinacion tà har entrar la question occitana en la vita publica.