Lo Conselh Regionau d’Aquitània qu’a adoptat los navèths estatuts de l’Ofici Public de la Lenga Occitana. Aqueths navèths estatuts que son estats votats en urgéncia en rason de la decision de l’Estat de participar au Gropament d’Interès Public Ofici Public de la Lenga Occitana.

Los conselhèrs regionaus qu’an donc acceptat la preséncia de l’Estat en aqueth GIP e qu’an acceptat la soa participacion financièra au foncionament.

Un còp lo vòte passat la setmana qui vien an Conselh Regionau Miègjorn-Pirenèus que podem esperar que l’Ofici que serà lèu un organisme qui pertocarà los territòris de Lemosin e de Lengadòc. las duas regions que’s deven maridar dab Aquitània e Miègjorn-Pirenèus. Enfin que’s poderé que Ròse-Aups e demandèsse la soa integracion a l’OPLO, çò qui nos miarà a aver dens l’Ofici tanben la region Auvèrnha, un còp las doas regions apariadas l’an qui vien.

La creacion de l’OPLO que poderé donc marcar la creacion deu prumèr organisme public de politica lingüistica qui aurà a obrar sus la quasi totalitat deu territòri occitan. Que mancarà lo territòri de Provença.

La nautat qu’ei la preséncia de l’Estat obtienguda après la mobilizacion de tots suu tèma de « n’i a pro d’estar mespresats ! ».

La Region Aquitaine vient de confirmer son attachement à la création d’un Office Public de la Langue Occitane. L’assemblée régionale a voté les nouveaux statuts qui incluent la présence de l’Etat qui a accepté de faire partir du Groupement d’Intérêt Public Office Public de la Langue Occitane. Il reste à la région Midi-Pyrénées à voter les mêmes statuts la semaine prochaine, le 9 juillet. Il aura fallu la mobilisation de l’occitanisme sur le thèma « que n’i a pro d’estar mespresats » pour convaincre l’État de venir dans cet Office Public et pour qu’il s’engage à participer ainsi à la définition d’une politique publique en faveur de la langue occitane.

Dens los qui compausaràn lo GIP Ofici Public de la Lenga Occitana que i aurà tres representants de cada region e dus representants de l’Estat. l’un que serà un rector e l’aute que serà un Director regionau deus ahars culturaus.

L’Estat que participarà a las despensas de foncionament de l’Ofici dab un apòrt financièr e tanben per la mesa a disposicion d’ua persona qui tribalharà en l’encastre de l’Ofici.

Las regions tanben que portaràn moneda e mejans entà har foncionar l’Ofici Public de la Lenga Occitana.

Aqueth foncionament non tocarà pas briga los mejans autrejats a las ajudas a las associacions e autes organismes qui tribalhan en favor de la lenga.

Tanben los actors associatius e autes qui son suu terrenh que seràn associats a l’elaboracion de la politica de l’Ofici Public de la Lenga Occitana en l’encastre d’un comitat consultatiu.

La parucion au JO de la Republica de la creacion de l’Ofici Public de la Lenga Occitana que serà rapida. L’Estat que s’ei engatjat a abracar la procedura en dar lo dossièr a signar au sol prefècte de la region Miègjorn-Pirenèus. Qu’ei possible ! Qu’ei a’s demandar perqué n’ac volón pas har atau abans. Que ns’averé estauviat hòrt de problèmas.

La prumèra amassada oficiau de l’OPLO que’s deveré poder organizar a la fin de seteme o au començar d’octobre.

Que’m feliciti que la grèva de la hami qui hasoi pendent un drin mei de ua setmana sia estada utila entà desblocar un dossièr qui èra tancat en un burèu ministeriau. L’Estat qu’arrefusava de participar a l’OPLO pr’amor non volèva pas pagar per aqueth organisme interregionau e non i volèva quitament pas participar. Qu’aurà calut ua mobilizacion occitanista de las hòrtas entà har comprénar que n’i avèva « pro d’estar mespresats ».

David Grosclaude, le 6 juillet 2015

Que cau arregretar l’abstencion en lo vòte deu Conselh Regionau d’Aquitània deu grop « Forces Aquitaines » (Modem) qui a considerat per la votz de Denise Sent Pè que l’OPLO qu’èra estat bastit shens coordinacion dab lo departament deus Pirenèus-Atlantics.

Qu’èi podut respóner que n’èra pas vertat pr’amor qu’avem tribalhat dab aqueth departament( e tanben  en ua amassada qui’s tiengó que hè mei d’un an e on lo departament nos digó que non desirava pas peu moment participar directament au GIP mes qu’èra dispausat a collaborar.

Denise Saint-Pè qu’ei la vice-presidenta deu CG deus Pirenèus-Atlantics. Segur non devèva pas saber que la Region qu’avèva discutit dab lo CG 64 puishque la concertacion que’s hasó abans lo cambiament de majoritat au departament. Qu’ac averé devut saber.

Tots los autes elegits ( PS, EELV, FdG e UMP qu’an votat lo tèxte)