Excepcions francesas ?

Publié le Mis à jour le

Editoriau de la revista Occitania Viure al Pais d’aqueste mes de genèr e de heurèr. Abonament 21 Bis Camin de Matens 81600 Galhac , 24,50 euros /an 

Los mots tradicionaus de « Bona Annada ! » qu’an un gost particular augan quan vedem los projèctes qui son en cors, particularament après los atemptats de París deu mes de noveme.

Valls

Las causas que son anadas hòrt viste après aqueth episòdi francés d’un terrorisme qui tòca malurosament quasi de faiçon quotidiana centenats de hemnas e d’òmis capvath lo monde.

La reaccion qu’estó militara d’abòrd. Que contunha au dia de uei dab lo bombardament regular per avions francés — au demiei d’ua coalicion occidentau, araba e russa eteroclita e deus objectius qui son luenh d’estar convergents— de posicions on se son installats los combatants de l’Estat Islamic. Que vederam çò qu’ei l’eficacitat d’aqueths bombardaments ; mes en un periòde quan la guèrra se hè tanben per las bancas, que seré benlhèu planviengut de s’atacar aus canaus qui permeten a l’EI de sortir la moneda qui amassa regularament, peus sons pilhatges e gràcia au son comèrci. Lo prètz de las bombas e de las missions aerianas que dèu estar plan superior a l’embaucha d’especialistas deus trafics financèrs.

Se los bombardaments non son pas eficaçs qu’auràn au mensh acontentat ua partida de l’opinion e dat ua postura guerrèra a un govèrn qui sembla de’n tirar profieit. .

Puish que viengó l’Estat d’Urgéncia recondusit. Cada dia que’ns vienen alimentar en informacions chifradas sus lo nombre de perquisicions qui son estadas possiblas gràcias a aqueth Estat d’Urgéncia. Que s’i parla tanben deu nombre d’armas sasidas, de personas mesas en residéncia susvelhadas.

Qui averé podut imaginar que l’intervencion de jutges (d’ara enlà pas necessària en periòde d’Estat d’Urgéncia) e podèva estar tant paralisanta ! Pr’amor qu’ei plan lo messatge qui ei enviat a la societat. Totas aqueras precaucions democraticas qu’entravan lo tribalh de la polícia ! Pròva que n’ei, lo hèit qu’adara arribam a estar mei eficaç !

Que vederam mei tard la realitat d’aqueras estatisticas e d’aqueras chifras. que son dejà contestadas. Mes l’òra n’ei pas a har rasonaments e a chicanejar mes qu’ei l’òra, dab l’uelh dur e l’espiada fixa de díser que : « la securitat ei la prumèra de las libertats e que s’ac vau de sacrificar quauques libertats entà assegurar la nosta securitat ». Quan avetz gahat aquera afirmacion per darrèr las aurelhas qu’ètz en de bonas disposicions entà enténer la reflexion dita de dret sens popular, la qui vos atucarà e vos harà barrar lo claquet : « de tota faiçon los qui an las mans netas non riscan pas arren ! ».

Dab açò que podetz anar dromir tranquilles !

Fin finala l’Estat d’Urgéncia pòt entrar dens la constitucion e quauques mesuras pòden estar presas entà que l’Estat d’Urgéncia se perlongue sens aver besonh de’u declarar. Que los jutges non sian pas mei dens la bocla : aquò rai ! Perquisicion a tota òra ! Assignacion a residéncia sus simpla suspicion ! Comportament suspècte e frequentacions dobtosas…avisatz-ve !

Mes com n’avetz pas arren a v’arcastar… ( verificatz totun ! ) qu’ètz tranquillòts. Las mesuras d’excepcion son sonque contra los terroristas e los bons ciutadans non riscan pas arren !

Totun l’Istòria qu’ei ironica, quitament en aqueths periòdes de tension hòrta. Mentre que Manuel VALLS e’ns explica tot l’interès de las mesuras excepcionaus qui demanda aus parlamentaris de votar shens moniguejar e shens discutir qu’ei un cèrt deputat occitan socialista d’Auda qui en 1955—quan se votè la lei sus l’Estat d’Urgéncia— explicava que l’istòria nos provava que : « totas las leis d’excepcion (…) son per la seguida destraviadas deu lor objectiu prumèr ». (1) Aqueth deputat que s’aperava Francis VALS e que citava tots los domaus hèits per las divèrsas leis d’excepcion adoptadas en França en un sègle e miei…Sonque ua omonimia evidentament. Per çò d’aute nada semblança !

David Grosclaude

(1) Le Monde 5 de decembre 2015, citat per Thomas Wieder dens un article a prepaus de las leis d’excepcion e de l’esquèrra.

Publicités

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s